( चाल : सबसे मीठा बोल ... )

कराहो सफल भूमिदान चेतवा हे शांतीचे रान ॥धृ0॥

भूमि असे ही शेतकऱ्यांची कसेल अणि राबेल तयांची ।

असे असुनहि मजूर फिरती कष्टुनि रानोरान। कराहो ॥१॥

कष्ट करावे तरिच जगावे सांगति नेते - संत प्रभावे ।

मग का मिळतो ऐसे असता - लुचपत खोरा मान । कराहो Il२॥

उद्योगी - जन उपाशी मरती चुगलखोर बहु मजा मारती ।

पूर्वजांचि घेऊन कमाई - दाविति उसनी शान । कराहो ॥३॥

भूमिदान हे सफल बनविता मिळेल कष्टीकांना सत्ता ।

तुकड्यादास म्हणे लोकांनो ! द्या समतेला मान । कराहो ॥४॥

-पंढरपुर दि. २२-०७-१९५३