आठवा आठवा रे, आठवा पांडुंरंग I

संसार दुःखरूप घेऊ नका त्याची भंग ॥

संत हे मायबाप साधा तयांचा संग।

उठा उठा झोप सोडा फेड आपुला पांग ॥ १ ॥

सावध सावधान म्हणा मुखी राम राम।

संसार करोनीया ठेवा मनी प्रभू-प्रेम ।। धृ० ॥

चौर्यांशी लक्ष योनी जीव फिरोनी आला ।

अवचित मनुष्याचा देह आजी मिळाला ॥

सद्बोध प्राप्त व्हाया पावली वेळ ही त्याला ।

दवडता काय वाया? काय न कळेतुम्हाला ?॥ सावध0 ॥२॥

होतील कर्म धर्म पावाल ते अंतकाळी ।

सांगेल चित्रगुप्त लिहिले असेल जे भाळी ॥

प्रगट की गुप्त कर्म ओकेल तो तदा सगळी ।

का भूल पावता ही दुख घेता कपाळी ॥ सावध० ॥३॥

आरक्त सूर्य झाला सत् संकल्प करा आता ।

जा उठा झोप सोडा भजा रुक्मिणीकांता ॥

त्याविना गति नाही मानवा न कुणी त्राता ।

तुकड्याची हाक ऐका सुख घ्याल तत्वता ॥ सावध०॥४ ॥