(चाल : अवताराचे कार्य कराया...)

सुराज्य येण्यासाठि उभे पण - मार्ग मधातुनि रुकलाना ॥धृ0॥

धनीक लोभी पैसा सोडि ना

मजुर न कामा नेट धरी ।

शेति - शक्ति वाढेल कशी ? गोवंश वधाने दुखलाना ॥१॥

नैतिकता प्रार्थना विसरुनी

नाच - तमाशे घरोघरी I

भांग दारु हौसिने पिण्याला तरुण अमुचा शिकलाना ॥२॥

कितितरि बहिणी विधवा फिरती

जुन्या रुढ्या पापे करवी ।

धर्म - वेड गेले न अजुनिही जातिवर्ण हा चुकलाना ॥३ ॥

कार्य विधायक करावयासी

जीव सदाचा लाज धरी ।

उठला सुटला होइ पुढारी मान जनाचा मुकलाना ॥४॥

बहुजन जनता साक्षरतेला

पात्र न झाली पूर्णपणे ।

तुकड्यादास म्हणे यासाठिच बाग प्रगतिचा सुकलाना ॥५॥