आरती

( चाल : आरती कुंजबिहारीची ... )

अंबिके ! तारक सकलांची I प्रीय तू मायचि जगताची ॥

निर्मिशी स्फूर्ति ज्ञानाची । शक्ति आदिच्या अनादिची ॥

रुप सुंदर लावण्याची I झळकली कळा नभावरची ॥

मुनीजन ध्याती तुज ध्यानी I

सृष्टिची तूच उपादानी I

निर्मिशी सहज लोक तिन्ही I

पदी घे दास पुरवि मम आस करी रिपुनाश ।

वास तव सदा असो वाची । स्मराया वेदऋचा साची ॥१॥

सुवर्णापरी रंग तनुचा । कुंकुमित मळवट श्रीशिरिचा ॥

दिव्य मणि तेजवि नेत्रीचा । प्रबल ओज हा सुशक्तीचा ॥

मर्दुनी मद तू असुरांचा । करिशि प्रतिपाळ भाविकांचा ॥

न घे बलिदान सज्जनांचे ।

ओढिशी प्राण पापियांचे ।

वर्णिती ख्याति सर्व साचे ।

सिद्ध करि काम धरिति जे प्रेम धन्य तव नाम ।

धाम तव सृष्टिच ही साची । प्रगटली माय ज्ञानियांची ॥२॥

कुठे कालिचे रूप धरुनी । कुठे तू महिषासुर - मथनी ॥

कुठे मंगलादेवि म्हणुनी । कुठे जगदंब विश्वजननी ॥

कुठे तू योगेश्वरि भुवनी । कुठे संक्रांतिदेवि म्हणुनी ॥

अमित तव रुपे सृष्टिमाजी ।

गमे मज तूच जगा साजी ।

तुझ्याविण ब्रह्म न ये काजी ।

सर्वमय आई ! सदा सुखदायी ! नमो तव पायी ।

होइ रथ - वाहक तुकड्याची । भक्ति मज दे श्रीसद्गुरुची ॥३॥